twitter

Ab mehfil e ghazal mein ghazal aashna hai kaun?
Mana keh aik hum hain magar doosra hai kaun?

Qatil nay jab pukara keh ehl e wafa hai kaun?
Sab loag jab khamosh rahay bol utha hai kaun?

Tum apni anjuman ka zara jaeyza to lo
Kahnay ko to chiragh bohat thay, jala hai kaun?

Dava sukhan ka sab ko hai lekin tamaam umr
Ek dushman e sukhan se mukhatib raha hai kaun?

Sab dekhtay jidhar hain udhay kya hai, kuch nahi
Hum dekhtay jidhar hain udhar dekhta hai kuan?

Tasveer e maikada meri ghazlon mein dekhiye
Sanbhal raha hai kaun, nashay mein gira hai kaun

Main ek naqsh e paa hun magar main bataun ga
Is raah se jo guzra hai woh qaafla hai kaun

Sab dost aik aik kar kay mujhay chortay gaye
Dushman bhi dung hai ke ye tanha khara hai kaun

Ghar bhi tera, gali bhi teri, shehr bhi tera
Jo chahay jis ko kah day tujhe rokta hai kaun?

‘Aajiz’ ye kis se baat karo ho ghazal mein tum?
Parda uthao, hum bhi to dekhain chupa hai kaun?

Kaleem Ajiz
Thursday, August 27, 2015 | 0 comments | Labels:
Zameen kesi lagay gee, aasman kesa lagay ga
Hamare baad tumko yeh jahaan kaisa lagay ga

Thakay hary huay suraj ki bheegi roshni main
Hawaaon say ulajhta baadbaan kesa lagay ga

Jamay qadmon ke neechay phisalti jaey gee rait
Bikhar jaey gee jab umr-e-rawaan kesa lagay ga

Isi mitti main mil jaey gee poonji umr bhar ki
Giray gee jis ghari deewar-e-jaan kesa lagay ga

Bohat itra rahay ho dil ki bazi jeetnay par
Zeyan baad-az-zeyan baad-az-zeyan kesa lagay ga

Woh jis kay baad ho gee ek musalsal be-neyazi
Ghari bhar ka wo sab shor o fughan kesa lagay ga

Abhi se kya bataen marg-e-majnun ki khabar par
Sulook-e-kucha-e-na-mehrbaan kesa lagay ga

Batao to sahi aye jaan-e-jaan kaisa lagay ga
Sitaron se bhara ye aasman kaisa lagay ga

Iftikhar Arif
| 0 comments | Labels:
Dil girafta hi sahi, bazm saja li jaey
Yaad e janan se koi shaam na khali jaey

Rafta rafta yehi zindan mein badal jate hain
Ab kisi sheher ki bunyaad na daali jaey

Mushaf e rukh hai kisi ka keh beyaz e Hafiz
Aisay chehray say kabhi faal nikaali jaey

Wo murawwat se mila hai to jhuka dun gardan
Meray dushman ka koi waar na khaali jaey

Be-nawa sheher ka saya hai mere dil pe Faraz
Kis tarah say meri aashufta khayali jaey
| 0 comments | Labels:
Ajab junoon e musafat main ghar se nikla tha
Khabar nahin hai keh suraj kidhar se nikla tha

Ye kaun phir se unhin raaston main chor gya
Abhi abhi to azaab e safar se nikla tha

Yeh teer dil main magar be sabab nahi utra
Koi to harf lab e chaaraagar se nikla tha

Yeh ab jo aag bana sheher sheher phela hai
Yahi dhuaan meray deewar o dar se nikla tha

Main raat toot ke roya to chain se soya
Keh dil ka zeher meray chashm e tar se nikla tha

Ye ab jo sar hain khamida, kulah ki khatir
Ye aib bhi to hum ahl e hunar se nikla tha

Wo Qais ab jise majnun pukaarte hain ‘Faraz’
Teri tarah koi deewaanaa ghar se nikla tha

Ahmed Faraz
| 0 comments | Labels:
Bohat Farsooda Lagtay Hain Mujhay Ab Yar Ke Qissay
Gul-O-Gulzar Ki Batain, Lab-O-Rukhsar Ke Qissay

Yahan Sab Ke Muqdar Mein Faqat Zakham-e-Judai Hai
Sabhi Jhothy Fasanay Hain Wisal-e-Yar Ke Qissay

Bhala Ishq-o-Mohabbat Sey Kisi Ka Pait Bharta Hai
Suno Tum Ko Sunata Hoon Mein Karobar Ke Qissay

Meray Ahbab Kehtey Hain Yahi Ek Aib Hei Mujh Mein
Sar-e-Dewar Likhta Hoon Pas-e-Dewar Ke Qissay

Mein Aksar Is Lye Logon Se Ja Kar Khud Nai Milta
Wohi Bekar Ki Batain,Wohi Bekar Ke Qissay..!!!
| 0 comments | Labels:
Meray saal-e-guzashta
Teray daaman mein
Meray ashkon ki dolat hai
Meri aahon ke naghmay hein
Meri subhon ke saray rang
Aur mehjoor raaton ke
Kai bey faiz sapnay hein

Meray saal-e-guzashta
Tu ne apny roz-o-shab saray
Meri tanhaai bhi dekhi
Meri ruswaai bhi dekhi
Meray yaaron ke saray roop
Sab behroop bhi dekhay
Mujhy jalta hua dekha

Meray saal-e-guzashta
Mein ke sadiyon sey
Teray dast-e-duaa mein
Ghamkadon mein bain kartay
Sar bureeda harf rezon ki
Sinaan per lehlahaatay aanchlon ko
Daan kar paya

Meray saal-e-guzashta bol
Kiya shikwa karoon tujh say
Ke hasrat ke siwaa mein nay
Tumhaari saij per bethi
Nai umeed ki dulhan ko
Munh dikhlaai kya di hai
Bara dukh hai

Meray saal-e-guzashta aa
Dareeda daamani, maflooj lehjay
Aur mazi ke her ik ghaao ko
Mil ke dafan kartay hein
Meri aankhon mein umeedon ke laashay
Ab talak bay-gor bikhray hein
Mein aankhein band karta hoon

Meray saal-e-guzashta aa
Thakan aalood rasmon ko bhula dalein
Mein in maqhoor haathon ko uthata hoon
Teray daman mein koi khwaab baaqi hai
To woh mujh ko saza kar day
Meri bay aabroo sochon ko
Goyai ataa kar day

Meray saal-e-guzashta aa
Ke ab ik feslaa kar lein
Nai sooraj ke pehlay din
Koi sapna naya dekhain
Wagarna aakhri shab ko
Tumhaary hamqadam mein' bhi
Adam ko laut jaaun ga
| 0 comments | Labels:
Kisi ki aankh purnam hai, Muhabbat ho gai ho gee
Zuban per qissa e ghum hai, Muhabbat ho gai ho gee

Kabhi hasna kabhi rona, kabhi hans hans kay ro dena
Ajab dil ka yeh aalam hai, Muhabbat ho gai ho gee

Khushi ka hud say barh jana bhi ab ik bay qarari hai
Na gham hona bhi ik gham hai, Muhabbat ho gai ho gee

Kabhi aankhon hi aankhon mein wo baton ka bata dena
Kabhi takraar barham hai, Mohabbat ho gai ho gee

Kisi ko saamnay paa kar, kisi kay surkh honton per
Anokha sa tabassum hai, Muhabbat ho gai ho gee

Jahan veeran raahain theen, jahan hairaan aankhain theen
Wahan phoolon ka mausam hai, Muhabbat ho gai ho gee

Her ek silvat pe bister ki kisi ka naam likha hai
Diye ki lau bhi madham hai
Muhabbat ho gai ho gee

Wednesday, November 5, 2014 | 0 comments | Labels:
Yeh pihlay ishq ki batain hain
Jab aankh main khwab damaktay thay
Jab dil main dagh chamaktay thay
Jab palkain sheher ke raston main
Ashkon ka noor lutati theen
Jab saansain ujlay chehron ki
Tun mun main phool sajati theen
Jab chaand ki rim jhim kirnon se
Sochon main bhanwar par jatay thay
Jab aik talatum rehta tha,
Apnay bay-unt khayalon main
Her ehd nibhanay ki rasmain
Jab aam theen hum dil walon main
Ab apnay bheegay honton per
Kuch jaltay bujhtay lafzon ke
Yaqoot pighaltay rehtay hain
Ab apni gum sum aankhon main
Kuch dhool hai bikhri yadon ki
Kuch gard alood say mausam hain
Ab dhoop ugalti sochon main
Kuch paimaan jaltay rehtay hain
Ab apnay weeran angan main
Jitni subhon ki chandni hai
Jitni shamon ka sona hai
Us ko khaakstar hona hai
Ab yeh batain rehnay deejiye
Jis umr main qissay buntay hain
Us umr ka gham sehnay deejiye
Ab apni ujri ankhon main
Jitni roshan si batain hain
Us umr ki sab saughatain hain
Jis umr kay khwab khayal huay
Wo pichli umr thi, beet gai
Wo umr bitaey saal huay
Ab apni deed kay rastay main
Kuch rung hai guzray lamhon ka
Kuch ashkon ki baratain hain
Kuch bhoolay bisray chehray hain
Kuch yadon ki barsatain hain
Yeh pichlay ishq ki batain hain

Mohsin Naqvi
| 2 comments | Labels:
Tu jafa ki, main wafa ki raah pe hain gaamzan
Peechay mur ke dekhta tu bhi nahi main bhi nahi

Tu mujhay, main tujhay ilzam dharta hoon
Apnay mun main jhankta tu bhi nahi main bhi nahi

Maslehat ne ker diye donon main peda ikhtalaaf
Werna fitrat ka bura tu bhi nahi main bhi nahi

Budgumani sheher main kis ne phela di jab ke
Aik doosray se khafa tu bhi nahi main bhi nahi

Jurm ki nauiyaton main kuch tawafat ho to ho
Dar haqeeqat parsa tu bhi nahi main bhi nahi

Jaan e Mohsin tu bhi tha ziddi ana mujh main bhi thi
Donon khudsar thay jhuka tu bhi nahi main bhi nahi
| 0 comments | Labels:
Andhyari raat ke aangan main yeh subh ke qadmon ki aahat
Yeh bheegi bheegi sard hawa, yeh halki halki dhundulahat
Gaari main hoon tanha mehv e safar aur neend nahi hai aankhon man
Bhoolay bisray armanon ke khwabon ki zameen hai aankhon main
Aglay din hath hilatay hain, pichli peetain yaad aati hain
Gumgashta khushiyan aankhon main aansu bun ke lehrati hain
Seenay ke weeran goshon main ik tees se karwat leti hai
Wo rahain zehen main ghoomti hain jin rahon se aaj aaya hoon
Kitni umeed se pohncha tha, kitni mayoosi laya hoon


Sahir Ludhyanwi
| 0 comments | Labels: