twitter


Mujhay us nay kaha aao nai dunya basatay hain
Usay soojhi shararat thi, yeh dil kuch aur samjha tha


Friday, September 11, 2009 | 0 comments | Labels:

Gehri gehri aankhon wali
Uljhi uljhi pagal larki
Tu yeh kis ki dhun mein aakhir
Lambi lambi palkoon ooper
Motay motay aansoo lay kar
Sundar komal pairon neechay,
Julti balti dharti day ker
Qariya qariya bhaag rahi hai,
Kis ki khaatir jaag rahi hai

Tujh ko yeh maaloom nahi kya
Tujh jaisi najanay kitni
Gehri gehri aankhoon wali
Kaisi kaisi sundarta kay
Dhair khazanay lay kar nikleen
Lakin phir bhi us rastay say
Manzil tak pohchanay wala
Har ik saathi jhoota nikla
Ik ik aasha dushman nikli
Ik ik sapna dhoka nikla
Sachha har ik khadsha nikla

Dekho! Tum bhi janay do ab
Nadaani ka jitna rasta
Tum nay ab tak tay kar dala
Us rastay say ghar ki manzil
Ab bhi itni door nahi hai
Ab bhi wapis ja sakti ho
Sab kuch wapis pa sakti ho
Ab bhi agar tum nadani kay
Is rastay say ghar ko wapis na palti
To phir ik din aisa ho ga
Sundar aankhein mar jain gee
Palkein khoon se bhar jain gee
Jaan laboon par aa jaye gee
Tan kay saaray ujlay pan ko
Ghor musafat kha jaaye gee

Uss din phir tum chilaao gee
Lakin kuch haasil na ho ga
Saray lams ke bhookay saathi
Pankh laga kay urr jain gay
Tum rastay mein reh jaao gee
Rasta bhi woh keh jis kay peechay
Darr ki gehri dadal ho gee
Aagay gham ka jungle ho ga
Sar par gehra badal ho ga

Uss din kay aanay say pehlay
Uss din tak jaanay say pehlay
Waqat milay to dhalnay walay
Har lamhay ki zaat pay socho
Duniya ki bareek nazar say
Duniya ki har baat pay socho
Jazboon ki auqaat hi kiya hai
Jazboon ki auqaat pe socho
Woh dekho !!
Ik saaye par phir weeranay mein bijli karki
Gehri gehri aankhoon wali
Uljhi ulhji pagal larki.........!

| 5 comments | Labels:
-->
Faraz us ki hansi main chupay dard ko mehsus to kar
Woh younhi hans hans kay khud ko saza deta hai


| 0 comments | Labels:

Aas dil main nahi aankhon may koi pyas nahi
Chund yadoon kay siwa kuch bhi meray paas nahi

Zindagi hay keh lapakta hua shola hay koi
Jal bujha jis may meray dil ka haseen taaj mahal
Tujh ko apnanay ki khwahish tujhay paanay ki lagan
Ab hai jesay koi jhulsa hua be rang kanwal

Gard-e-alam say mamoor hein ab wo raahein
Jin say guzray thay kabhi saath hum hanstay hanstay
Zehr-e-tanhai bhi ab dil pe asar karta nahi
Thak gai gham ki syah raat bhi dastay dastay

Meri afsurda jawani pe amaavas ki yeh raat
Aur ta hadd-e-nazar aas ka jugnoo bhi nahi
Apni marhoom tamannaon pe maatam kay liye
Haif ab aankhon kay kashkool may aansoo bhi nahi

Apnay kaandhay pe liye apni tamannaon ki laash
Ghoomta phirta hoon aabadi main veeranay main
Koi aisa nahi jo rok lay itna poochay
Kon ho? Kis liye aawara ho? Kya dukh hay tumhein?

Sochta hoon mera jeena bhi koi jeena hay
Aik hi sur main jo bajta hay wahi saaz hoon main
Kho gaya hoon main gham-e-zeest kay sehraaon main
Mujh ko aawaz na do gum shuda aawaz hoon main

Aas dil main nahi aankhon may koi pyas nahi
Chund yadoon kay siwa kuch bhi meray paas nahi

Wednesday, September 9, 2009 | 3 comments | Labels:
-->
Ussi ishq say, ussi chah say, ussi pyar say, ussi maan say
Mere hath main koi gulab do, main bohat dinon se udas hoon


Sunday, March 8, 2009 | 8 comments | Labels:

Tumhari aankhain kehti hain hisar-e-zaat say niklo

Tamanna meri ban jao, shab-e-barbaad say niklo


Kinara thaam lo dil ka bhula do her gila shikwa

Kabhi sachi hansi hans do punari yaad say niklo


Khayal-e-yaar acha hai magar jis nay wafa na ki

Palat ker phir sada na do, dar-e-faryad say niklo


Nahin koi muhabbat bhi, jijr rut bhi, raqabat bhi

To yeh dharka sa kya, kahiye, wehem ki ghaat say niklo


Sukhanwer hum say kehta hai saja lo ankh main kuch khwab

Dharakna dil ko sikhla do, amaawas raat say niklo


Nahin tum ko gawara ab hamara qurb to keh do

Hamaray karb ki choro, tum is gardaab say niklo


Sar-e-maqtal jo jatay ho, na ho darmandgi kuch bhi

Zamana daikh tham jaye, kuch is andaas say niklo


| 2 comments | Labels:

Hum jo pohonchay sar-e-maqtal to yeh manzar daikha

Sab say uncha tha jo sar, nok-e-sina per daikha

Hum say mut pooch keh kab chaand ubharta hai yahan

Hum nay suraj bhi teray sheher maian aa ker daikha

Pyaas yaaron ko ab us morr pay lay aai hai

Rait chamki to yeh samjhay keh samandar daikha

Aisay liptay hain dar-o-baam say ab kay jaisay

Hadson nay bari muddat main mera ghar daikha

Zindagi bhar na hua khatm qayamat ka azaab

Hum nay her saans main barpa naya mehshar daikha

Itna bay-his keh pighalta hi na tha baton say

Aadmi tha keh tarasha hua patthar daikha

Dukh hi aisa tha keh roya tera Mohsin warna

Gham chhupa ker usay hanstay huay aksar daikha


| 1 comments | Labels:

Mujhey arzoo e seher rahi yunhi raat bhar bari dair tak
Na bikhar sake na simat sake yunhi raat bhar bari dair tak

Hai bohat azaab aur akaily hum, shab e gham bhi meri taweel tar
Rahi zindagi bhi saraab aur rahi aankh tar bari dair tak

Yahan har taraf hai ajeeb samaan, sabhi khud pasand, sabhi khud numa
Dil e be-qaraaar ko na mila koi chara gar bari dair tak

Mujhay zindagi hai aziz tar isi wastey mery hamsafar
Mujhay qatra qatra pila zehr, jo karey asar bari dair tak


Na sakoon e jaan na shreek e gham mila is jahan mein chaar su
Teri yaad thi meray saath jo rahi dar ba dar bari dair tak

Yahan shehar e dil bhi udaas hai aur ujaar ujaar si rah guzar
Rahey teray baad dhwaan dhwaan meray baam o dar bari dair tak

Friday, March 6, 2009 | 1 comments | Labels:


Kya aah bharay koi
Jab aah nahin jati
Dil say bhi zara gehri
Aur arsh say kuch oonchi

Kya nazm likhay koi
Jab khwab ki qeemat mein
Aadarsh ki soorat mein
Kashkoal gada'ei ka
Shaa'ir ko diya jaey
Aur roak liya jaey
Jab shair utarnay say
Badal say zara oopar
Taaron say zara neechay

Kya khaak likhay koi
Jab khaak kay medaan par
Ungli ko hilanay say
Toofan nahin uth'ta
Jab shakh pay imkan ki
Is dasht-e-tamanna mein
Ik phool nahin khilta
Rahbar nahin ruktay
Mohoam si manzil par
Aankhon kay isharay say
Aur noor ki boondon ki
Bochhar nahin hoti

Ik neelay sitaray say


Jab dil kay bulaway par
Iss jheel kanaray par
Peghaam nahin aata
Ik door ka bashinda
Ik khwab ka shehzada
Gulfaam nahin aata

Basti mein koi aurat
Raaton ko nahin soati
Jaagi huwi aurat ki
Soi hui qismat par
Jab koi bhi deewana
Be chain nahin hota
Dehleez kay pathar say
Takra kay jabeen apni
Ik shakhs nahin rota

Jab neend kay shedaei
Khwabon ko tarastay hain
Aur dekhnay kay aadi
Binaei say dartay hain
Reh reh kay andheray say
Aankhon mein utartay hain

Aankhon kay ujalon say
In phool say bachchon say
Keh do keh na ab nangay
Paa'on say chalein ghar mein
Is farsh pay mitti kay
Ab ghaas nahin ugti
Ab saamp nikaltay hain
Deewar say aur dar say

Ab noor ki boondon say
Mehki hui mitti mein
Anmol ujalay kay
Woh phool nahin khiltay
Ab jheel kanaray par
Bichhray bhi nahin miltay
Basti mein koi aurat
Raton ko nahin soti
Aur jagnay walon say
Ab nazm nahin hoti

Kya nazm likhay koi
Jab jagnay, sonay mein
Pa lenay mein, khonay mein
Jab baat kay honay mein
Aur baat na honay mein
Kuch farq na reh jaey
Kya baat karay koi !



Sunday, February 15, 2009 | 3 comments | Labels:


Amar kar lo woh sab lamhay

Jo ham nay yun guzaray hain

Sahar kar lo woh sab raatein

Jahan apni hi dunya thi

Jahan saansein bhi apni theen

Jahan sapnay bhi apnay thay

Safar kar lo woh sab rastay

Jahan kuch bhi wafaaein hain

Jahan khushbu hai pyaron ki

Jahan yaadein hain yaaron ki

Fikar kar lo zara ik pal

Keh tum ne kis ko khoya hai

Usay tum dhoond paao gay

Kabhi phir dekh paao gay

Thehar jaao jahaan ho tum

Keh us bin tum adhooray ho

Kabhi phir mil na paao gay

Usay dhoondo gay yaadon main

Usay is pal bula lo tum

Keh yeh lamhay tumhaaray hain


Thursday, February 5, 2009 | 0 comments | Labels:


Zeest hai haari hui baazi ki tarah
Rooh main utarnay lagi hai sard thakan
Yaas ki dhundh chaa rahi hai har soo
Barhnay lagi hai aankhon main jalan
Shehar-e-khwaab khaakastar honay kay qareeb
Ik udaasi hai har taraf madham madham
Bahaar par bhi khizaan ka ghumaan honay laga
Chalay bhi aao mere maseeha mere hamdam
Tum jo chalay aaoo to dil ka nagar raoshan ho
Dil-e-bhojal ko milay khushi-e-jawedaan
Taptay wujood ko saaya-e-abr milay
Shab-o-roz kehnay lagain nai daastan
Zindagi ki raah'guzaaron par tum jo mere sang chalo
Chaand saath chalay baad-e-saba saath chalay
Diye jalnay lagain denay lagain manzilon ka pata
Hayaat gun'gunaanay lagay tu jo thaamay haath chalay



| 0 comments | Labels:

Bay sada lafzon main
Wajh-e-zindagi keh kay
Wasl ki zaroorat par
Phir say zor detay hein
Aaj aisa kertay hein
Zikr wohi kertay hein
Naam aur detay hein
Zabt ke kinaaron say
Dard aan lipta hai
Toot'tay kinaaray ab
Dard aur detay hein
Aaj aisa kertay hein
Dard say ulajhtay hein
Zabt chor detay hein
Taar taar daaman ko
Khaar khaar raahon main
Ranjishein bhula kay ham
Aa kay jor detay hein
Aaj aisa kertay hein
Khud nahin palat'tay hein
Raah mor detay hein
Sabz sabz maosam main
Laal laal aankhon kay
Khwaab ki ragon se ham
Khoon nichor detay hein
Aaj aisa kertay hein
Ye bhi kar guzartay hein
Khwaab tor detay hein
Aa keh ab duaaon ko
Maatami ridaaon main
Phir se kar kay alwidaa
Mauqa auor detay hein
Aaj aisa kertay hein
Darya main utartay hein
Rab pe chor detay hein


Friday, January 30, 2009 | 0 comments | Labels:


Ik shab aankh kinaray …

Neend say pehlay aao,

Khwab-e-safar per saath chalain gay

Ik doojay ka haath pakar ker …

Jhootay sachay ehed karain gay,

Main kuch un dekhay sapnon ki ..

Ungli thaam kay lay aaon gee,

Tum kuch ru-pehli taberain ..

Zaad-e-safar kay taur per lana … …

Ho sakta hai khwab-e-safar main

Barish bhi ho, aandhi bhi ho

Ho sakta hai toofanon nay,

Shart safar say baandhi bhi ho …

Ho sakta hai kuch jugnoo, kuch taaray

Apni raah main aain

Ho sakta hai ghor andhairay main hi

Hum donon kho jain

Is jungle main nadi kinaray

Thoray sapnay bo aain gay

Aur behti nadi main donon

Gham ki gard bhi dho aain gay

Ik bargad kay pair kay neechay

Teray shanay per sir rakh ker

Main apnay sab dukh ro loon gee

Tum apni jalti aankhon per

Meri barf hatheli rakhna .. !

Tum yadon kay roshan jugnoo

Apni mutthi main bhar lena

Main bhi aanchal kay pehloo main

Ujli yadain rakh laoon gee

Is dauraan hi khwab ki devi

Hum donon say haath chura ker

Such ki bheer main kho jaye gee..!

Chahay such kitna karwa ho

Dukh ko maat to ho jaye gee..!

Phir tum neend nagar ko jana

Main khwabon main reh jaoon gee

Ik shab aankh kinaray

Neend say pehlay aao

Khwab-e-safar per saath chalain gay!


| 0 comments | Labels:


Shab-e-hijraan ki aziyyat ki khabar kis ko hai
Meir gumnaam muhabbat ki khabar kis ko hai

Kis ko ehsas meri shedat-e-jazbaat ka hai
Meri halat meri wehshat ki khabar kis ko hai

Kon weraan makanon ki khabar rakhta hai
Meri ujri hoi halat ki khabar kis ko hai

Main nay chup chap muhabbat kay sitam jhailay hain
Meri iss darja sharaafat ki khabar kis ko hai

Kon aaye ga ab aay dil tujh ko tasalli denay
Teri udas tabiyat ki khabar kis ko hai.....!


| 1 comments | Labels:


Taar-e-rag-e-hayaat jo larzaan hai aaj kal
Saaz-e-wafa pe koi ghazal khwaan hai aaj kal

Markaz bana hua hoon kisi ki nigaah ka
Mujh par gham-e-hayat bhi aasan hai aaj kal

Phir hain junoon nawaaz nigahon ki shokhiyan
Maa'il ba'naaz deeda-e-janaan hai aaj kal

Daanista phir kisi ki tawajjo hai is taraf
Barbadiyon ka phir koi samaan hai aaj kal

Tajdeed-e-wada haa-e-wafa chaahata hoon main
Phir shamma-e-ishq dil main farozaan hai aaj kal

Wo meri kaiynaat-e-mohabbat se kya gaye
Dunyaa-e-aarzu meri weeraan hai aaj kal

Wajid kisi se phir hai umeed-e-wafa mujhe
Phir aarzu-e-khwaab pareshaan hai aaj kal



| 0 comments | Labels:


Bikharna tootna bhi aor anaa ke saath bhi rehna
Sitam eejaad bhi karna, wafa ke saath bhi rehna

Tera andaaz aisa hai andheron ki kahaani main
Jalaana kuch diye bhi aur hawa ke saath bhi rehna

Yahaan to shokhiyon ko apni zebaaii se matlab hai
Lahu main bhi machalna aur hina ke saath bhi rehna

Ajab rang-e-ta'aluq hai mohabbat ka mere dil se
Keh us ko torna bhi aur sada kay saath bhi rehna

Haram aur dair sab naqsh-e-mohabbat hain, to dil ko hai
Khad-o-khaal-e-butaan main bhi, khuda ke saath bhi rehna


| 0 comments | Labels:


Hamara kya hai keh ham to charagh e shab ki tarah

Agar jalay bhi to bas itni roshni ho gee

Keh jesay tund andhairon ki raah main jugnoo

Zara si dair ko chamkay, chamak kay kho gaye

Phir us kay baad kisi ko na kuch sujhai day

Na shab katay na suragh-e-sahar dikhai day

Hamara kya hai keh ham to pus-e-ghubar-e-safar

Agar chalay bhi to bas itni raah taey ho gee

Keh taiz hawaaon kay zard maa’il naqsh-e-qadam

Zara si dair ko ubhray ubhar kay mit jaey

Phir us kay baad na rasta na rahguzar milay

Had-e-nigah talak dasht-e-bay kinar milay

Hamari samt na daikho keh koi dair main ham

Qabeela-e-dil-o-jaan say juda honay walay hain

Basay basa’aye huay sheher apni aankhon kay

Misal-e-khana-e-weeran ujarnay walay hain

Hawa ka shor yehi hai to dekhtay rehna

Hamari umar kay khaimay ukharnay walay hain

Wednesday, January 28, 2009 | 0 comments | Labels: