twitter

Bazahir aam lehjay main
Kaha tha main nay jab us se
“Badal lo raasta apna
Juda rahain yaheen karlo
Hamaray chahnay na chahnay se kuch nahi hota
Yehi sach hai keh hum do mukhtalif
Raston kay raahi hai
To phir kyon dil ki manain hum???
Shuru main manta hoon main
Aziyyat dil ko pohanchay gi
Magar phir waqt guzray ga
Sabhi zakhmon ko bhar day ga”
Meray is aam say lehjay pay wo
Ik pal ko chonki thi
Meri aankhon main aankhain daal kar
Hairat se poocha tha
“Yeh sab jo keh rahay ho khud ko samjha bhi pao gay?”
Bohat hi jee kara kar ke
Main us dam muskuraya tha
Bohat khud pay jabr kar ke
Main us say keh yeh paya tha
“Meri tum fikr rehnay do
Sambhal jaoon ga main khud hi
Sabhi zakhmon ko sii loon ga
Bhula kar sari batoon ko
Akaila bhi main jee loon ga”
Buhat hi be yaqeen aakhoon se
Us ne mujh ko dekha
Aur
Bina ik lafz bolay wo gai
Aur phir nahi aai
Aur ab tark-e-taalluq ko
Agarcheh umar beeti hai
Magar is dil pe us ki zaat ka
Jo naqsh qaaim tha
Kabhi dhundla nahi hota
Mujhay mehsoos hota hai ke jaisay
Meray kanoon main
Wo apni bolti aankhoon se
Sargoshi si karti hai
“WO SAB JO KEH RAHI THEEN
KHUD KO WO SAMJHA BHI PAYE HO?”
Friday, December 12, 2008 | 0 comments | Labels:
Meri aankhon main aansu phigalta raha, chand jalta raha
Teri yaadon ka sooraj nikalta raha, chand jalta raha

Koi bistar pe shabnam lapaitay huay khuawb daikha kiya
Koi yaadon mai karwat badalta raha, chand jalta raha

Meri aankhon main campus ki sab sa’atain jagti hain abhi
Nehar per tu meray sath chalta raha, chand jalta raha

Main to yeh janta hoon ke jis shab mujhay chor kar tum gaye
Asmaanon say shola nikalta raha, chand jalta raha

Raat aye to kya kya tamashay huay tujh ko maloom hai?
Teri yaadon ka sooraj ubalta raha, chand jalta raha

Raat bhar meri palkon ki dehleez per khwab girtay rehay
Dil tarapta raha, hath malti reha, chand jalta raha

Yeh december ke jis main karri dhoop bhi meethi lagnay lagay
Tum nahi to december sulagta raha, chand jalta raha

Aaj bhi woh taqaddus bhari raat mehki hui hai Wasi
Main kisi main, koi mujh main dhalta raha, chand jalta raha
| 0 comments | Labels:
Pyar ke samandar main
Har utarney waaley ko
Kashtiyan nahin milteen
Dur dur tak janan
Dhoop ki musaafat hai
Aur kaheen bhi pal bhar ko
Dhoop ke musaafir par
Saaye’baan nahin khultey
Is ajab samandar main
Umr ki reyaazat kay bad
Hum nay yeh jana hai
Jis tarha fizaon main
Urney waley panchi par
Bars ha baras main bhi
Aasman nahin khulta
Hijr-e-beykaraan main bhi
Bhaid, bhaid rehta hai
Raazdan nahin miltey
Baam-o-dar nahin khultey
Pyar ke samandar main
Har utarney waaley ko
Kashtiyan nahin milteen
Aur mil bhi jain to
Baadban nahin khultey
Pyar ke samandar main
Bhaid bhaid rehta hai
| 0 comments | Labels:
Raat baaqi thi abhi jab sar-e-baaleen aa kar
Chaand nay mujh sey kaha - “Jaag sehar aai hai
Jaag is shab jo mey-khwaab tera hissa thi
Jaam kay lab sey teh-e-jaam utar aai hai”
Aks-e-janan ko vida kar ke uthi meri nazar
Shab ke thehrey huay pani ki syah chaadar par
Ja-baja raqs mein aanay lagay chaandi ke bhanwar
Chaand ke haath say taaron ke kanwal gir gir kar
Doobtey, tertey, murjhatey rahey, khiltey rahay
Raat aur subh bohat dair galay miltay rahay

Sehen-e-zindaan main rafeeqon kay sunehray chehray
Sath-e-zulmat say damaktay huay ubhray kam kam
Neend ki aus nay in chehron say dho dala tha
Dais ka dard, firaq e rukh e mahboob ka gham

Dur naubat hui, phirnay lagay bezaar qadam
Zard faaqon kay sataey huay pehray walay
Ehl e zindaan kay ghazabnaak, kharoshan nalay
Jin ki bahon main phira kertay hain baahain dalay

Lazzat e khwab say makhmoor hawain jageen
Jail ki zeher bhari chor sadaein jageen
Dur darwaza khula koi, koi bund hua
Dur machli ki zanjeer, machal ke roi
Dur utra kisi taalay kay jigar main khanjar

Sar pataknay laga reh reh kay dareecha koi
Goya phir khwab say bedaar huay dushman e jaan
Sang o faulad say dhaalay huay jinnat e giraan
Jin kay chungal main shab o roz hain faryaad kunan
Meray bekaar shab o roz ki nazuk paryaan
Apnay shehpur ki raah dekh rahay hain yeh aseer
Jis kay tarkash main hain umeed kay jaltay huay teer
| 0 comments | Labels:


Kabhi yun jo ho kisi din agar
Kabhi tu mujhey sare-e-raah miley
Mein hazaar lamhon ko khainch kar
Yeh jo chalta waqt hai baandh dun

Yeh jo gardishen hein zameen ki
Usi ik lamhey pe ruki rahain

Mein taka karun tujhey jazb sey
Yunhi pyar sey yunhi ishq sey
Teri her adaa ko samait luun
Mein hisaar-e-jaan mein sajaa rakhun
Na tu keh sakey , na mein keh sakun
Tu jo paas ho to mein jee sakun
Tu jo door ho na jiya karoon


Kabhi yun jo ho kisi din agar
Merey humsafar tu jo na miley
Mein hazaar dharkanon ko khainch kar
Ye jo chalta dil hai baandh dun

Ye jo silsiley hein meri saans key
Teri doori mein hi haar dun
Tu jo paas ho to mein jee sakun
Tu jo door ho , na jiya karun

Kabhi yun jo ho kisi din agar
Merey hum safar tu jo na miley…!

| 0 comments | Labels:
Muhabbat diary her giz nahin hai
Jis mein tum likho
Keh kal kis rang kay kapray pehannay, Kaun si khushbu lagani hai
Kisay kya baat kehni, kon si kis se chupani hai
Kahan kis pair kay saaye talay milna hai
Mil kar poochna hai
Kya tumhein mujh say muhabbat hai?
Yeh farsooda sa jumla hai
Magar phir bhi yeh jumla
Dareechon, aanganon, sarkon, gali koochon mein, chaubaron mein
Chaubaron ki tooti seerhiyon main
Har jaga koi kisi say keh raha hai
Kya tumhein mujh say muhabbat hai?
Muhabbat diary her giz nahin hai
Jis mein tum likho
Tumhein kis waqt, kis say, kis jagah milna hai, kis ko chor jana hai
Kahan per kis tarha ki guft-o-gu karni hai ya khamosh rehna hai
Kis ke sath kitni door tak jana hai aur kab laut aana hai
Kahan aankhein milana hai kahan palkein jhukana hain
Ya yeh likho keh ab ki baar jab woh milnay aaye aga
Tu us ka haath apne haath mein lay kar
Dhanak chehray pay roshan jagmagati raqs karti uski aankhon mein utar jain gay
Aur phir gulshan-o-sehra ke beecho beech dil ki saltanat mein khaak urra’ein gay
Bohut mumkin hai woh ujlat mein aaye
Aur tum us ka haath haathon mein na le pao
Na aankhon hi mein jhanko, aur na dil ki saltanat ko fatah kar pao
Jahan per guft-o-gu karni hai, tum khamosh ho jao
Jahan khamosh rehna hai, wahan tum boltay jao
Naye kapray pehan kar ghar se niklo, mailay ho jao
Koi khushbu laganay ka irada ho, to sheeshi haath se gir jaye
Tum weeran ho jao
Safar karnay se pehlay bay sar-o-saman ho jao
Muhabbat diary her giz nahin hai, aab ju hai
Jo dilon ke darmiyan behti hai, khushbu hai
Kabhi palkon pe lehraye, To aankhein hansnay lagti hain
Jo aankhon mein utar jaye to manzar aur pas manzar mein shamaein jalnay lagti hain
Kisi bhi rang ko choo lay
Wohi dil ko gawara hai
Kisi mitti mein ghul jaye
Wohi mitti sitara hai

Saleem Kauser
Wednesday, November 19, 2008 | 0 comments | Labels:

Nahi mil raha hai yahan kaheen meri zaat ka hi nishan mujhey
Sun aey justuju dey jawaab tu, ke ley aai hai ye kahan mujhey!

Wo sabaq mein parh ke bhula chuka ke usool banatey hein zindagi
Mujhey mantaqi si daleel dey, ye muhawarey na suna mujhey

Tujhey kya khabar mein dil mein dard, liye phir raha hoon ajab ajab
Teri mashq puraani hai yaar tu, kya ghaao dey ga naya mujhey

Nahi kuch gila ke ye sab hai kya, bhaley kuch ajab hai ye maajra
Keh merey aik jurm pe baar baar, koi dey raha hai sazaa mujehy

Ye jo chaahaton ke bazaar hein yahaan bik raha hai sabhi magar
Yahan kon ley ga wafaa ki jins, bhala kya miley ga nafaa mujhey!

Merey hum’nawa bhala mein kahan, terey waastey mujhey bhool ja
Tu ney khwahishon ke auraq par, kaheen likh dia to mita mujhey

Yun diye na rakh merey haath pe ke katain ge nahi phir raastey
Kabhi rok lein gi baarishein to kabhi tang karey gi hawa mujhey

Kataa zindagi ka katthin safar, mein muflisi mein mraa magar
Mein gulshanon ka makeen tha, zara khushbu'ain to laga mujhey

| 0 comments | Labels:

Ye Raakh Raakh Rutein, Apni Raat Ki Qismat
Tum Apni Neend Bujhaao, Tum Apnay Khuaab Chuno
Bikherti Doobti Nabzoon Pe Dhiyaan Kya Dena
Tum Apnay Dil Main Dharaktay Huay Haroof Suno
Tumharay Shehar Ki Galiyon Main Sail-e-Rang Bikhrain
Tumharay Naqsh-E-Qadam Phool Phool Khiltay Rahien
Woh Rahguzar Jahan Tum Lamha Bhar Thehar Kay Chalo
Wahan Pe Abar Jhukein, Aasmaan Miltey Rahien
Nahin Zaroori Kay Har Ajnabi Ki Baat Suno
Har Aik Sada Pe Dharakna Bhi Dil Ka Farz Nahin

Sukoot-E-Hulqa-E-Zanjeer-E-Darr Bhi Kyun Tootay
Saba Ka Saath Nibhaana Junoon Ka Qarz Nahin
Hum Aisay Log Bohat Hain Jo Sochtay Hi Nahin
Kay Umer Kaisey Kati, Kis Kay Saath Beet Gaee
Hamari Tushna-Labi Ka Mizaaj Kya Jaanay
Keh Fasal-e-Bakhshish-e- Moj-e-Faraat Beet Gayee
Ye Aik Pal Tha Jissay Tu Nay Noch Dala Hai
Woh Aik Sadii Thi Jo Bay-Iltifaat Beet Gaee
Hamari Aankh Lahoo Hai, Tumhein Khaber Hogi
Chiraagh Khud Se Bujha Hay Keh Raat Beet Gayee

Friday, November 7, 2008 | 0 comments | Labels:


-->
Main kehti thi kaho itna kahan tak aazmaa’o gay
Wo bola bus wahan tuk, jab tum apni jaan se jao gay


Saturday, November 1, 2008 | 0 comments | Labels:

Woh meri zaat mein jab tak raha likhna nahe bhooli
Koi bhi dard jo mein ne saha likhna nahe bhooli

Woh jo mehvar thaa likhne ka, juda ho kar mila ek din
Mila tu yeh kaha us ne suna likhna nahe bhooli

Suna hai ab bhi chaahat mein tumhara naam ‘Saail’ hai
Suna hai ab bhi tum mujh ko Khuda likhna nahe bhooli

Suna hai ab bhi tum mujh ko mere Saahir bulati ho
Suna hai mujh ko rag rag mein basa likhna nahe bhooli

Kaha ke bhool bethi hoon hatheli per hina likhna
Magar mein aasmanoo per dua likhna nahe bhooli

Samay ke uth’tay mathay per tujhe dhoonda, bahut dhoonda
Samay ke jhuktay shanoo per sada likhna nahe bhooli

Mujhe ek din mere kaatib ne likha thaa juda tujh se
Mein tujh ko aaj bhi khud se juda likhna nahe bhooli

Chupane ke leye sab dukh abhi bhi muskurati hoon
Mein ab bhi chehre per chehre naya likhna nahe bhooli

Mein ab bhi is judai mein kae dukh dard sehti hoon
Mein ab bhi teri aankhoon ko shifa likhna nahe bhooli

Kiya thaa tarq-e-taaluq ka iraada aik pal mein ne
Mein ab bhi us iraaday ko saza likhna nahe bhooli

Batao tum mujhe Janaan! mein kaise bhool sakti hoon
Abhi qudrat mera jeevan numa likhna nahe bhooli

Judaee kaat li mein ne magar marnay se kuch pehle
Mein zindaan ke darechoon per saba likhna nahe bhooli

| 0 comments | Labels:


-->
Meray kam-sukhan ka yeh hukm tha, keh kalam us say main kam karoon
Meray hont aisay silay keh phir, meri chup nay us ko rula diya

| 1 comments | Labels:

Usey kehna ………!

Humaim kab farq parta hai

Keh…..!

Hum tou shaakh say tootey huay pattey

Buhat arsaa hua hum ko

Ragain tak mar chukeen dil ki

Koi paaoun taley rondey

Jalaa kar raakh kar daaley

Hawaa kay haath par rakh kar

Kahin bhi phaink day hum ko

Supurd-e-khaak kar daaley

Humain ab yaad hi kab hay?

Keh hum bhi eik mausam thay

Kisi gulshan ki zeenat thay

Kisi tehni ki qismat thay

Kai aankhon ki raahat thay

Yaa jeewan ki hararat thay

Buhat arsa hua woh khawaab sa mausam

Humaarey haath sey phisla

Ya shaaid phir khizaan mausam ko

Hum apna samajh bethey

So uss din say……

Kisi mausam say ab apna

Koi rishta nahi banta

Kisi ki shaakh ki baanhein

Humain pehchaanti kab hein?

Kabhi hum inki dharkan they

Ye shaakhein maanti kab hein?

| 0 comments | Labels:

Kabhi tum laut ke aao
Mujhay bus itna samjhao
Kahan se seekh li tum ne,
Ada mujh ko bhulane ki

Tumhain mujh se jo shikwa tha
Ya koi bhi shikayat thi
Na ki koshish batanay ki
Bbhala yun chor ke apna
Koi apnon ko jata hai

Musalsal dukh ki barish main
Yun jeevan bhar rulata hai
Abhi tau rait geeli hai
Banay apnay gharondon ki
Abhi sub naqsh baqi hain
Gaye qadmon pe laut aao

Mujhay bus itna samjhao
Kahan se seekh li tum ne
Ada mujh ko bhulanay ki

| 0 comments | Labels:


-->
Kya Shart-e-Mohabbat Hai, Kya Shart-e-Zamana Hai
Aawaz Bhi Zakhmi Hai Aur Woh Geet Bhi Gaana Hai


| 0 comments | Labels:

Mujhay aur kahin lay chal sanwal

Jahan raat kabhi bhi soi na ho
Jahan subah kissi pe roi na ho
Jahan hijer ne wehshat boi na ho
Jahan koi kissi ka koi na ho

Mujhay aur kahin lay chal sanwal

Jahan haath na phalain dar bhi na ho
Jahan roog kisi k ghar bhi na ho
Jahan aazadi ka dar bhi na ho
Jahan tootay phootay par bhi na ho

Mujhay aur kahin lay chal sanwal

Jahan shaher hoon sare wairane
Jahan loog sabhi hoon baigane
Jahan sab k sab hoon dewane
Jahan koi humain na pehchane

Mujhay aur kahin lay chal sanwal

Jahan nafrat dil mein bus na sake
Jahan koi kissi ko dus na sake
Jahan koi kissi pe huss na sake
Jahan koi b gunjal kass na sake

Mujhay aur kahin lay chal sanwal

Jahan dard kissi ko raas na ho
Jahan koi bhi uddas na ho
Jahan zulmat ki boo bass na ho
Jahan too hhi ziada pass na ho

Mujhay aur kahin lay chal sanwal....!!!

Monday, October 27, 2008 | 0 comments | Labels:

Kat he gai judai bhi kab yun hua ke mar gaye
Tere bhi din guzar gaye meray bhi din guzar gaye

Tu bhi kuch aur aur hai hum bhi kuch aur aur hain
Jane wo tu kidhar gaya jane wo hum kidhar gaye

Rahon main he mile they hum rahen nasib ban gain
Tu bhi na apne ghar gaya hum bhi na apnay ghar gaye

Wo bhi gubar-e-Khak tha hum bhi gubar-e-khak they
Wo bhi kaheen bikhar gaya hum bhi kaheen bikhar gaye

Koi kinar-e-ab-e-ju baitha hua hai sarnigun
Kashti kidhar chali gai jane kidhar bhanwar gaye

Tere liye chale the ham tere liye thehar gaye
Tu ne kaha to ji uthe tu ne kaha to mar gaye

Waqt he kuch judai ka itna tavil ho gaya
Dil mein tere firaq ke jitne the zakham bhar gaye

Barish-e-vasl wo huie sara gubar dhul gaya
Wo bhi nikhar nikhar gaya ham bhi nikhar nikhar gaye

Itne qarib ho gaye itne raqib ho gaye
Wo bhi Adeem dar gaya ham bhi Adeem dar gaye ....!

| 0 comments | Labels:

Tohmatain to lagti hain
Roshni ki khahish main
Ghar say bahir aanay ki kuch saza to milti ha

Loag loag hotay hain
Unko kiya khabar ja'ana
Aap kay iradoon ki khubsurat aankhon main
Basnay walay khaboon kay rang kaisay hotay hain
Dil ki good aangan main palnay wali batoon kay
Zakham kaisay hotay hain
Kitnay gehray hotay hain

Kub ya soach saktay hain
Aisi baygunah aankhain
Ghar kay konay khudroon main chup kay kitna roti hain

Phir bhi yey kahani say
Apni kuj bayani say

Is qadar rawani say dastaan sunatay hain
Aur yakeen ki aankhain
Sach kay ghamzada dil say lag kay kitna roti hain

Tohmatain tu lagti hain
Roshni ki khawish main
Tohmatoon kay lagnay say
Dil kay dost ko jaa'na
Ab nidhal kiya karna
Tohmatoon say kiya darna

| 0 comments | Labels:

Yeh kon meray dil main yeh kehta hai keh main hoon
Mehsoos karoon usko to lagta hai keh main hoon

Kon khailta rehta hai na janay koi dil say
Nadaan k haathoon main khilona hai keh main hoon

Yaadain hain k reh reh k sulag uthti hain aksar
Badal koi tham tham k barasta hai keh main hon

Woh rang, woh khushbu, meri ab mujh main kahan hai
Yai shaakh say toota hwa ghuncha hai keh main hoon

Rastay ka mujhay hosh na manzil ki khabar kuch
Toofan main urta hua patta hai keh main hoon

Aanso meray hans hans k yahi pooch rahay hain
Sailab main behta hwa tinka hai keh main hoon

Kuch aur he aalam hai meri zaat main pinha
Dunia main koi aur bhi rehta hai keh main hoon

| 0 comments | Labels:

Dard phail jaye tou aik waqat aata hay
Dil dharakta rehta hay
Arzoo gazidoon kay hoslay nahi chaltay
Dasht-e-bay yaqeeni main asray nahi chaltay
Rah-ro-on ki ankoon main
Manzilen na jab tak hoon, qaflay nahi chaltay
Ik zara tavajo say daikhiye tu khulta hay
Log in per chaltay hain, rastay nahi chaltay
Sochnay samajhnay say, saath saath chalnay say
Doriyan smat'ti hain, faslay nahi chaltay
Khwab khwab aankoon main ratjagay nahi chaltay
Darguzar kay halqay main masalay nahi chaltay
Do diloon ki qurbat main teesra nahi hota
Vastay nahi chaltay
Bakht sathh chalta hay taal-e-azmaon kay
Waqat raam kernay main tujzeeon kay dao kya
Tajrabay nahi chaltay
Ishaq kay ilaqay main hukm-e- yar chalta hay
Zaabtay nahi chaltay
Husan ki adalat main aajzi tu chalti hay
Mertabay nahi chaltay
Dosti kay rishtoon ki perwarish zarori hay
Silsalay ta'aluq kay, khud say ban tu jatay hain
Lakin in shagofoon ko totnay bikharnay say
Rokna bhi perta hay
Chahatoon ki matti ko, arzo kay poday ko
Senchna bhi perta hay
Ranjishon ki baton ko bolna bhi perta hay

| 0 comments | Labels:

Abhi kuch din lagain gay
Dil aesay shehar kay pamaal ho jaanay ka manzar bhoolnay main
Abhi kuch din lagain gay
Jahan-e-rung kay saaray khas-o-khaashaak,

Sub saru-o-sanober bhoolnay main
Abhi kuch din lagain gay....
Thakay haaray hooway khwaaboun kay saahil par,

Kaheen ummeed ka chota sa ik ghar
Bantay bantay reh gaya hay
Woh ik ghar bhoolnay main, abhi kuch din laggain gay

Magar ab din hee kitnay reh gaye hain
Buss, ik din dil kee loh-e-muntazir per
Achaanak
Raat utray gee
Meri baynoor aankhoun kay khazaanay main chupay

Her khwaab kee takmeel kar day gee
Mujhay bhee khwaab main tabdeel kar day gee
Ik aisa khwaab jiss kaa dekhnaa mumkin naheen tha
Aik aisaa khwaab jiss kay daaman-e-sud chaak main koi mubarak
Koi roshan din naheen thaa
Abhi kuch din laggain gay

| 0 comments | Labels:

Kis tarah rokta hoon ashkoon ko
Kis tarah dil pe jabr karta hoon
Aaj bhi kaar zaar-e-hasti mein
Jab tere shehar se guzarta hoon


Dil bhi kartaa hai yaad chhup ke tujhe

Naam leti nahi zubaan tera..
Is qadar bhi nahin mujhe maloom
Kis muhalley mein hai makaan tera
Koun si shaakh-e-gul pe raqsaan hai
Raqs-e-firdaus, aashyaan tera
Jaaney kin vaadiyoon mein thehra hai
Ghairat-e-husn, karvaan tera
Kis se puchoon ga mein khabar teri
Koun batlaaye ga nishaan tera
Teri rusvaaiyoon se darta hoon
Jab tere shehar se guzarta hoon


Haal-e-dil bhi na keh saka garchay
To rahi muddaton qareeb mere
Kuch teri azmaton ka dar bhi tha
Kuch khayalat bhi thay ajeeb mere
Aakhir-e-kar woh ghari aayi
Yar war ho gaye raqeeb mere
Tu mujhe chor kar chali bhi gayi
Khair qismat meri naseeb mere
Aab main kiyon tujh se piyar karta hoon
Jab tere shehar say guzarta hoon

Wo zamana teri muhubat ka
Aik bholi hoi kahani hai
Tere koochay main umr bhar na gaye
Sari duniya ki khaak chani hai
Lazat-e-qurb ho keh zakhm-e-firaq
Jo bhi hai teri meharbani hai
Kis tammana say tujh ko chaha tha
kis muhabbat say har mani hai
Aapni qismat pay naz karta hoon
Jub tere shehar se guzarta hoon

Aaj bhi karzar-e-hasti main
To agar aik bar mil jaye

Kisi mehfil main saamna ho jaye
Ya sar-e-rahguzaar mil jaye
Aik nazar daikh lain mohabbat say
Aik lamhay ka pyar mil jaye
Chain aa jaye aarzoon ko
Hasraton ko qarar mil jaye
Jane kiya kiya khayal karta hoon
Jab tere shehar se guzarta hoon

Koi pursan-e-haal ho to kahon
Kesi aandhi chali hai tere baad
Din guzara hai kis tarha main nai
Raat kese dhali hai tere baad
Roz jeeta hon roz marta hoon
Jub tere shehar say guzarta hoon

Tujh se koi gila nahi mujh ko
Main tujhe bewafa nahin kehta

Tera milna khuab-o-khayal hua
Phir bhi na-aashna nahin kehta
Wo jo kehta tha muh ko awara
Main us ko bhi bura nahin kehta
Warna ik be nawa muhabbat main
Dil kay lutne pay kiya nahi kehta

Main to mushkil say aah bharta hoon
Jub tere shehar say guzarta hoon

Saturday, October 25, 2008 | 0 comments | Labels:

Abhi waqt hai meray saath chal
Abhi paon main hain musafatain
Abhi raaston peh garift hai
Abhi hath rakha hua hai waqt ki baag per
Abhi meherbaan hai rahguzar bari door tuk
Abhi raastay bhi nahin utay huay hain ghubar main
Abhi hoslay hain jawan meray
Abhi dil main chalnay ka shoq hai
Abhi manzilon ka yaqeen hai to junoon bhi hai urooj per
Yahan aik jahan main jaanay kitnay jahan hain
Abhi daik apni umeed kay kisi baadban ko khol ker
Yeh jo kishtiyan si rawan hai seena-e-aab per
Isi aag ki hain nishaniyan yeh musafatain
Koi hisraton main suna gaya hai basharatain
Abhi waqt hai meray saath chal

| 0 comments | Labels:

Umr beeti hai jinhain hijr ki pemaish main
Hum syah bakht, teray faasla bardaar, musafir shab kay
Raat aati hai to chal pertay hain
Bay baha sulagi hui yaad kay angaaron per
Rooh bersaat main bharki hui aatish hai keh bujhti hi nahin
Raat aati hai to gir pertay hain
Teray undoh ki num ghaaron main
Kon ab aa kay nikalay humain
Kon tehraaye ga bikhray huay pat'ton kay naseeb
Hum jo ronday huay raston ki tarah
Aah bhi bhartay huay dartay hain
Jaanay phir konsi veerani guzar jaye achanak kisi veerani say
Hum jo thithkay huay bachon ki tarah
Sans bhi letay hua mertay hain
Zindagani kisi murjhaye huay dil ki tarah
Sog kay kapray main lipti hui bevah hai koi
Koi dum bhar bhi thehertay hai kisi aas ki chaon (shade) main to ro perti hai
Aur hum phir say nikal pertay hain
Hum syah bakht, teray faasla bardaar, musafir shab kay
Umr beeti hai jinhain hijr ki pemaish main
Raat aati hai to chal pertay hain

| 0 comments | Labels:

Abhi Thehro
Abhi kuch din lagain gay!

Vasl ko khwahish bananay main
Tumhain apna samajhnay kay liye dil ko mananay main
Abhi kuch din lagain gay

Abhi hum apni khwahishon ko dil say milnay dain
Inhain mehsoos karnay dain
Wafa kya hai or taqaza-e-mohabbat ki hadain kya hain?
Hadon ki sarhadain kya hain
Phir in kay paar janay ka sabab kya hai
Dheyan o bay-dheyani main
Tumhari bheegti baaton kay darya ki rawani mai
Kahani hi kahani main
Agar beja wo manzil
Koi khawashish
Dilon ki kokh say paida hui
To kon daikhay ga
Humaray naam ki sachai ko
Or khwahishon k bay-nasb mehtab chehron ko
Abhi thehro
Abhi kuch din lagain gay

Rishta-e-baynaam ko naam karnay main
Kahani ko kisi agaz say anjam karnay main
Kahin izhar karnay main
Humain iqrar karnay main
Abhi thehro
Abhi kuch din lagain gay!!!!!
Abhi kuch din lagain gay !!!!

| 0 comments | Labels:

Aur kuch hi dair main, jub phir meray dil ko
Fikr aa lay gee keh tanhai ka kia chara karay
Dard aaye ga dabay paon, liye surkh charagh
Woh jo ik dard dharakta hai kahin dil say puray

Shola-e-dard jo pehloo main lapak uthay ga
Dil ki deewar pe her naqsh damak uthay ga

Halqa-e-zulf kaheen, gohsa-e-rukhsar kaheen
Hijr ka dasht kaheen, gulshan-e-deedar kaheen
Lutf ki baat kaheen, pyar ka iqrar kaheen

Dil say phir ho gee maray baat keh aye dil aye dil
Yeh jo mehboob bana hai teri tanhai ka
Yeh to mehmaan hai ghari bhar ka, chala jaye ga
Is say kub teri museebat ka madawa ho ga
Mushtail ho kay abhi uthain gay wehshi saaye
Yeh chala jaye ga, reh jain gay baqi saaye
Raat bhar jin say rera khoon kharaaba ho ga
Jang thehri hai koi khail nahin hai aye dil
Dushman-e-jaan hain sabhi, saray kay saray qatil
Yeh kari raat bhi, yeh saaye bhi, tanhai bhi
Dard aur jang main kuch mail nahin hai aye dil
Lao, sulgao koi josh-e-ghazab ka angaar
Taish ki aatish-e-jarrar kahan hai lao
Woh dehekta hua gulzaar kahan hai lao
Jis main germi bhi hai, harkat bhi, tawanai bhi

Ho na ho apnay qabeelay ka bhi koi lashkar
Muntazir ho ga andhairay ki faseelon kay udhar
Un ko sholon kay rajz apna pata to dain gay
Khair, hum tuk wo na pohonchay bhi, sada to dain gay
Dur kitni hai abhi subh, bata to dain gay

| 0 comments | Labels:

Rahguzar, saaye, shajar, manzil dur, halqa-e-baam

Baam peh seena-e-mahtaab khula, aahista

Jis tarha kholay koi bund qaba, aahista

Halqa-e-baam talay, saayon ka thehra hua neel

Neel ki jheel

Jheel main chupkay say taera, kisi put’tay ka habab

Aik pal taera, chala, phoot gaya, aahista

Bohot aahista, bohot halka, khunk rang sharab

Meray sheeshay main dhala, aahista

Sheesha-o-jaam, suraahi, teray haathon kay gulaab

Jis tarha dur kisi khuab ka naqsh

Aap hi aap bana aur mita aahista

Dil nay dohraya koi harf-e-wafa aahista

Tun may kaha “aahista”

Chand nay jhuk kay kaha

“Aur zara aahista”

| 0 comments | Labels:
Hawa ko likhna jo aa gya hai
Ab us ki marzi
Keh wo khizan ko bahar likh dey
Bahar ko intezar likh dey
Safar ki khawish ko
Wahemon key azaab sey humkinar likh dey
Wafa key raston pe chalny walon ki qismatoon main
Ghubar likh dey
Hawa ko likhna jo aa gya hai
Hawa ki marzi
Keh vasl mausam main hijr ko hissa-dar likh dey
Mohabbaton main guzarny wali ruton ko
Na-paidar likh dey
Shajr ko kum saya daar likh dey
Hawa ko likhna jo aa gaya hai
Ab us ki marzi keh hamaray diye bujha kar
Shabon ko baikhtiyar likh dey
Hawa ko likhna sikhanay walon

Noshi Gillani
| 0 comments | Labels:

Iss Basti ke Ik koochey mein , Ik Insha Naam ka Deewana
Ik naar pe jaan ko Har gaya , mash'hoor hai uss ka afsaana

Uss naar mein aisa roop na tha , jis roop se din ki dhoop dabbey
Iss shehar mein kya kya gori hai , mehtaab rukhey gulnaar labbey
Kuch baat thi uss ki baatoo'n mein,kuch bhaid they uss ke chitwan mein
Wuhi bhaid ke joat jagaatey hain , kisi chahney waaley ke mann mein
Ussey apna banaey ki dhun mein , hua aap hi aap se begaana
Iss basti ke ik koochey mein ik Insha naam ka Deewana

Na chanchal khail jawani ke , na payaar ki al'harh ghaatein thein
Bus raah mein unn ka milna tha aur phone pe unn ki baatein thein
Iss Ishq pe ham bhi hanstey they , behasil sa behasil tha?
Ik roz biphartey sagar mein , na kashti thi na sahil tha
Jo baat thi in ke ji mein thi , jo bhaid tha yaksar anjaana
Iss basti ek ik koochey mein , ik Insha naam ka deewana

Ik roz magar barkha rutt mein , wo bhaadoon' thi ya sawan tha
Deewar pe beech sumandar ke , yeh dekhney waloo'n ne dekha
mastana haath mein haath diye , yeh aik Kagar pe baithey they
youn Shaam hui phir Raat hui , jab Sailaani ghar laot gey
kya raat thi wo - ji chahta hai uss raat pe likhein Afsaana
iss basti ke ik koochey mein ik Insha naam ka deewana

Haa'n Umar ka saath nibhaaney ke they Ehad bohat Paimaan bohat
wo jin pe bharosa karney mein kuch sood nahi , Nuqsaan bohat
wo Naar yeh keh kar door hui - " majboori Sajan Majboori"
yeh wehshat se ranjoor huye aur ranjoori si ranjoori
uss roz hamein maloom hua , uss shakhs ka mushkil samjhana
iss basti ke ik koochey mein , Ik Insha naam ka deewana

Go Aag se Chaati jalti thi , Go Aankh se darya behta tha
har aik se dukh nahi kehta tha , Chup rehta tha Gham sehta tha
Naadaan hain wo jo chairtey hain , iss aalam mein deewanoo'n ko
uss shakhs se aik jawab mila , sab apnoo'n ko baigaanoo'n ko
"kuch aur kaho to Sunta hoo'n , iss Baab mein kuch mat farmana"
iss basti ke ik koochey mein ik Insha naam ka deewana

Ab aagey ka Tehqeeq nahi , go sun'ney ko ham suntey they
uss Naar ki jo jo baatein thein , uss Naar ke jo jo Qissey they
ik Shaam jo uss ko bulwaya , kuch samjhaya bechaarey ne
uss raat yeh qissa paak kiya , kuch kha hi liya dukhyaarey ne
kya baat hui , kis toar hui ? Akhbaar se logoo'n ne jana
iss basti ke ik koochey mein , ik Insha naam ka deewana

Har baat ki khoj to theek nahi , tum ham ko kahani kehney do
Uss naar ka naam maqam hai kya , iss baat pe parda rehney do
ham se bhi soda mumkin hai , tum se bhi jafa ho sakti hai
yeh apna bayaa'n ho sakta hai , yeh apni Katha ho sakti hai
wo naar bhi aakhir pachtaayi , kis kaam ka aisa pachtaana?
iss basti ke ik koochey mein , ik Insha Naam ka deewaana

Monday, October 20, 2008 | 0 comments | Labels:

Aksar shab-e-tanhai main ' kuch dair pehlay neend say
Guzri hui dil-chuspian ' Beetay huay din aish kay
Buntay hain shama-e-zindagi ' Aur daaltay hain roshni
Meray dil-e-sud chaak per

Woh bachpan aur wo saadgi ' Woh rona woh hansna kabhi
Phir woh jawani kay mazay ' Woh dil lagi woh qehqahay
Woh ishq woh ehd-e-wafa ' Woh wada or woh shukriya
Woh lazzat-e-bazm-e-tarb ' Yaad aati hain ik aik sab
Dil ka kanwal jo roz-o-shab ' rehta shagufta tha so ab
Us ka yeh abtar haal hai ' Ik sabza-e-pamaal hai
Ik phool kumhlaya hua ' sookha hua bikhra hua
Ronda para hai khak per

Yun hi shab-e-tanhai main ' Kuch dair pehlay neend say
Guzri hui na-kaamiyan ' Beetay huay din ranj kay
Bantay hain shama-e-baykasi ' Or daltay hain roshni
Un hasraton ki qabr per

Jo aarzooain pehlay theen ' Phir gham say hasrat ban gaein
Gham doston kay faut ka ' Un ki jawan mot ka
Lay daikh sheeshay main meray ' Un hasraton ka khoon hai
Jo gardish-e-ayyam say ' Jo qismat-e-nakaam say
Ya aish-e-ghum anjaam say ' Merg-e-But-e-gulfaam say
Khud meray ghum main mer gaein ' Kis tarha paaon main hazeen
Qaboo dil-e-baysabr per

Jab aah un ahbab ko ' Main yad ker uthta hoon jo
Yun mujh say pehlay uth gaye ' jis tarha taa'ir baagh kay
Ya jesay phool aur patiyan ' Gir jain sun qabl khizan
Or khushk reh jaye shajr

Us waqt tanhai meri ' Bun ker mujassam baykasi
Ker deti hai pesh-e-nazar ' Ho haq sa ik weeran ghar
Berbaad jis ko chor ka ' Sub rehnay walay chal basay
Tootay keewar or khirkiyan ' Chut kay tapaknay kay nishan
Pernaalay hain rozan nahin ' Yeh hall hain aangan nahin
Perday nahin chilman nahin ' Ik shama tuk roshan nahin
Meray siwa jis main koi ' Jhankay na bhoolay say koi
Woh khana-e-shali hai dil ' Poochay na jis ko dev koi
Ujra hua weeran ghar

Aksar shab-e-tanhai main ' kuch dair pehlay neend say
Guzri hui dil-chuspian ' Beetay huay din aish kay
Bantay hain shama-e-zindagi ' Aur daltay hain roshni
Meray dil-e-sud chaak per

| 0 comments | Labels: