twitter

Ye zindagi hay ka hai chaman


Ye zindagi hay ka hai chaman, ajab yahan ka hai chalan
Koi kisi pay taana zan, koi kisi pay khanda zan

Kisi ko aish ki hawas, kisi ko ghum hi raas hai
Kisi ki aarzoo jawaan, kisi ka dil udaas hai
Isay khizaan se pyaar hai, usay bahaar ki lagan
Koi kisi pay taana zan, koi kisi pay khanda zan

Gham-o-alam ki aanch se, kabhi jo dil pighal gaye
To anjuman mein qehqahay bhi aansuo'n mein dhal gaye
Hawa-e-ghum ki mauj se bujhay charaagh-e-anjuman
Koi kisi pay taana zan, koi kisi pay khanda zan

Tarap rahi hain bijliyan, wo jal raha hay aashyaan
Wo lut raha hay gulistaan, wo hans raha hay baghbaan
Wo aa rahi hain aandhiyan, liye bahaar ka kafan
Koi kisi pe taana zan, koi kisi pe khanda zan
Monday, April 14, 2008 | 2 comments | Labels:

Khatm hui barish-e-sung

Na gahan aaj meray taar-e-nazar say kat gaye
Tukray tukray huay aafaq pe khursheed o qamar
Ab kisi samt andhaira na ujala ho ga
Bujh gai dil ki tarah raah e wafa meray baad
Dosto qafla-i-dard ka ab kya hoga
Ab koi aur karey parvarish e gulshan-i-gham
Dosto khatm hui dida-i-tar ki shabnam
Tham gya shor-i-junoon khatm hui barish-e-sung
Khaak-e-reh aaj liye hai lab e dildar ka rung
Koo-e-janan main khula meray lahoo ka parcham
Dekhiye detay hain kis kis ko sada meray baad
Kon hota hai hareef-e-mae mard afgan-e-ishq
Hai mukarrar saqi pe sala meray baad.

Saturday, April 12, 2008 | 0 comments | Labels:

Main sham orh kay so jaon

Talub ko ajar na doon, fikar-e-rahguzar na karoon!
Safar main ab kay hawa ko bhi hamsafar na karoon

Ubhartay doobtay sooraj say tor loon rishta
Main sham orh kay so jaon aur sahar na karoon

Ab is say barh kay bhala kya ho ehtiyat-e-wafa
Main tere sheher say guzroon, tujhe khaber na karoon!

Ye meray dard ki daulat, meri maata-e-firaaq
In ansu'on ki wazahat main umer bher na kroon!

Ujar shab ki khalish ben kay bun main kho jaoon
Main chandni ki terha khud ko derbader na karoon!

Wo aik pal ko dikhai to day kaheen Mohsin
Main jan gunwa k bhi us pal ko mukhtasir na karoon!

| 0 comments | Labels:

Abhi kya kahain abhi kya sunain

Abhi kya kahain abhi kya sunain
Keh sar-e-faseel-e-sukoot-e-jaan
Kaf-e-roz-o-shab pay sharar numa
Wo jo harf harf charagh tha
Usay kis hawa nay bujha diya
Kabhi lab hilain gay to poochna

Sar-e-sahar-e-ahad-e-visaal-e-dil
Wo jo nikhaton ka hujoom tha
Usay dast-e-mauj-e-firaaq nay
Tah-e-khaak kab se mila diya
Kabhi gul khilain gay to poochna

Abhi kya kahain abhi kya sunain
Yun hi khwahishon kay fishaar main
Kabhi bay sabab kabhi bay khalal
Kahan kon kis se bichar gaya
Kisay kis nay kaisay ganwa diya
Kabhi phir milain gay to poochna

Mohsin Naqvi

| 0 comments | Labels:

Iltemaas

Yehi gar zid tumhari hai
Chalo hum bhool jaatey hain!
Sabhi waadey, sabhi qasmain
Mohabbat ki sabhi rasmain
Nahi manzoor jo tum ko
Karain ranjoor jo tum ko
(Tumhaari shadmani hi azeez-az-jaan hai jab to
Tumhain phir tokna kesa?
Zyaan-o-sood ki baabat bhala phir sochna kesa)
Chalo hum bhool jatey hain
Mohabbat ki ryazat main
Wafaon ki musaafat main
Qadam kis ke kahan behkey, hui kis sey kahan larzish
Keh dar aai achanak say hamari aankhon main barish
Aur us ki tez boondon ne
Kisi tezaab ki soorat
Nishaan-e-manzil-e-dil hi jala dala, mita dala
Magar jaanan
Kahan aasan hota hey?
Jigar ka khoon ashkon mein badalna aur … bahaa dena
Khas-o-khashak chun chun kar
Nasheman ik banana aur … usi ko phir jala dena
Jawan sapnon ki laashon ko
Daroon-e-jaan chuhpaa kar … muskura dena
Khiza’ein paalna khud mein, baharain baant’tey phirna
Kahan aasaan hota hey..?
Buhat mumkin hey hum bhi haar hi jaein
Jawan hai zabt jo ab tak
Muqabil ghum ke aaey..aur Dhaey jaaey
Aur is mein bhi ta’ajub kya
Tumharey laut aaney ki, bachi ho aas jo koi
Nawa-e-be-zubaan bun kar
Sisak kar phir sey utthey aur..tum tak bhi pohonch jaaey
So tum sey ye guzarish hai
Tab ik ehsan tum karna
Palat kar dekhna yun sard nazron sey
Ke jo bhi aas zinda ho
Usay yaksar mita dena
Hamain pathar bana dena

Ishtiaq Zain
| 0 comments | Labels:

Kisi Lerki Say Mat Kehna

Kisi Lerki Say Mat Kehna
Kay Us Say Pyar Kertay Ho
Ager Ek Bay Dhayani Main
Yeah Iqrar Ker Bethay
Kisi Say Pyar Ker Bethay
To Phir Wadoon Ki DoRoon Main
Ualajh Ker Toot Jao Gay
Tumharay Pyar Ka Us Ko
Ager Ehsaas Ho Jayay
To Ho Sakta Hai Tum Us Ka
Rang-O-Roop Ban Jao
Mohabbat Kay Safar Main Shayad
Aaisa Morr Aajayay
Kay Tum Narazgi Ka
BerMila Izhaar Ker Bethay
Koi Inkaar Ker Bethay
To Yeah Samjhoo Koi Sheesha,
Koi Dil Toot Jayay Ga
Kay In Kay Dil Bohat Nazuk,
Bohat Kumzoor Hotay Hain
Kisi Lerki Kay Dil Ka Tootna Bhi
Mout Hoti Hai
Kise larkii se na kehna
Keh Us say Pyar karte ho

| 0 comments | Labels:

Dil ki naa maan, waqt nikal jaaey gaa

Dil ki naa maan, waqt nikal jaaey gaa
Dil tou phir dil hai, sambhal jaaey gaa

Bacha kay rakh umeedon ki kiran warna,
Tujhay saamp andhairon ka nigal jaey gaa

Tairay sar pay sajaa wo aahni gharoor,
Mairay ijz ki lau say pighal jaaey gaa.

Shab kay dilaason pay yakeen kyunkar ho,
Subah hotay hee fasaana badal jaaey gaa.

Chand pay reh magar matti ko bhi daikha kar,
Tuu khaaki hai, khaak mein mil jaaey gaa.

Mairee kamm raftaar, aur taiz ravee tairee,
Thamm jaaey gee jab damm nikal jaaey gaa.

Aag bharki hai tou daikhna aey dost,
Jo lagaata hai, aap bhi jal jaaey gaa.


Poet: Ali Zaman
| 0 comments | Labels:

Aisaa hi sahee

Uss nay kaha: pyaar karo,,

Mein nay kaha: darta hun mein

Uss nay kaha:" buzdil ho tum

Mein nay kaha: AISAA TOU NAHI

Phir yum huaa k raat din

Chaaron taraf bass pyaar thaa

Uss pyaar kaa ikraar thaa

Pehron thee uss say guftaguu

Har pal usee kaa khayaal thaa

Ikk duusray k saath thay

Waaday bhi saaray yaad thay

Phir yum huaa k aik din

Waaday wafa kay tor kar

Jaanay lagee sabb chhor kar

Mein nay kaha: eefaa karo

Uss nay kaha: dartee hun mein

Mein nay kaha: buzdil ho tum

Uss nay kaha: AISAA HEE SAHEE


Poet: Ali Zaman



Sunday, April 6, 2008 | 1 comments | Labels:
Subscribe to: Posts (Atom)