Yeh Shaam Shaam Zindagi

Dasht e Hijran Mein Saya Na Sada Teray Baad
Kitney Tanha Hain Teray Aabla Pa Teray Baad

Koi Paighaam Na Dildaar - Nawa Teray Baad
Khaak Urati Hoi Guzri Hai Saba Teray Baad

Lab Pey ik Harf e Talab Tha Na Raha Teray Baad
Dil Mein Taseer Ki Khwaahish Na Dua Teray Baad

Aks o Aaina Mein Ab Rabt Ho Kya Teray Baad
Hum To Phirtey Hain Khud Apnay Sey Khafa Teray Baad

Dhoop Aariz Ki Na Zulfon Ki Ghata Teray Baad
Hijr Ki Rut Hai Keh Habs Ki Fiza Teray Baad

Liye Phirti Hai Sar e Koo e Jafa Teray Baad
Parcham e Tar Girebaan Ko Hawa Teray Baad

Pairhan Apna Salamat Na Qaba Teray Baad
Bas Wohi Hum Hain Wohi Sehra Ki Rida Teray Baad

Nikhat o Ney Hai Na Dast e Qazaa Teray Baad
Shakh e Jaan Par Koi Ghuncha Na Khila Teray Baad

Dil Na Mehtaab Sey Uljha Na Jala Teray Baad
Aik Jugnoo Tha Chup Chap Bujha Teray Baad

Kon Se Rangon Key Bhanwar, Kesi Hina Teray Baad
Apna Hi Khoon Apni Hatheli Pey Saja Teray Baad

Dard Seenay Main Hua Noha-Sara Teray Baad
Dil Ki Dharkan Hai Keh Matam Ki Sada Teray Baad

Aik Hum Hain Keh Hain Be Barg o Nawa Teray Baad
Warna Aabaad Hai Eik Khalq e Khuda Teray Baad

Eik Qyamat Ki Kharashain Meray Chehrey Pe Sajien
Eik Mehshar Meray Ander Sey Utha Teray Baad

Tujh Sey Bichra To Murjha Key Hawa Burd Hua
Kon Daita Hai Mujhey Khilney Ki Dua Teray Baad

Aey Flak Naaz Meri Khaak Nasheeni Teri Bakhshish
Main Ney Mitti Pey Tera Naam Likha Teray Baad

Tu Keh Simta To Rag e Jaan Ki Hadon Mein Simta
Main Keh Bikhra To Samaita Na Gaya Teray Baad

Milney Waaley Kai Mafhoom Pehan Kar Aaye
Koi Chehra Bhi Na Aankhon Ne Parha Teray Baad

Bujhey Jatey Hain Khad o Khaal e Manazir e Ufaq
Phelta Jata Hai Khwaahish Ka Khala Teray Baad

Yeh Alag Baat Hai Keh Afsha Na Hua Tu Warna
Main Ney Kitna Tujhey Mehsoos Kiya Teray Baad

Meri Dukhti Hui Aankhon Sey Gawaahi Laina
Main Ne Socha Tujhey Apney Se Siwa Teray Baad

Seh Liya Dil Ney Teray Baad Malamat Ka Azaab
Warna Chubti Hai Rag e Jaan Mein Hawa Teray Baad

Jaan e Mohsin Mera Hasil Yehi Mubham Satrain
Shair Kehnay Ka Hunar Bhool Gya Teray Baad