Yeh Shaam Shaam Zindagi

Kaho, woh chand kesa tha?
Kaho, woh dasht kesa tha?
Jidhar sub kuch luta aaye
Jidhar aankhain ganwa aaye
Kaha, sailab jesa tha, bohot chaha keh buch niklain magar sub kuch baha aaye
Kaho, woh hijr kesa tha?
Kabhi choo ker usay dekha
To tum nay kia bhala paya
Kaha, bus aag hesa tha, usay choo ker to apni rooh yeh tun mun jala aaye
Kaho, woh wasl kesa tha
Tumhain jub choo liya us nay
To kya ehsas jaga tha?
Kaha, ik raastay jesa, jidhar say bus guzarna tha, makan lekin bana aaye
Kaho, woh chand kesa tha?
Falak say jo utar aaya!
Tumhari aankh main basnay
Kaha, woh khawab jesa tha, nahin taabeer us ki, usay ik shab sula aaye
Kaho, woh ishq kesa tha?
Bina perkhay kia tum nay
Kaha, titly kay rung jesa, bohot kachcha anokha sa, jabhi us ko bhula aaye
Kaho, woh naam kesa tha?
Jisay sehraaon or chanchal
Hawaon per likha tum nay
Kaha, bus mosmon jesa, na janay kis tarha kis pal kisi ro main mita aaye
Suno, kwahish ki lehron per sambhalna kyun hua mushkil?
Bataya paanion per khwab ki rakhi bina jesay
Bhala tum rooh ki in kirchion main dhoondtay kia ho?
Kaha, yeh itni roshan hain keh sooraj hai diya jesay
Suno aankhon hi aankhon ka bayan kesay laga tum ko?
Laga, phoolon say sargoshi si kerti hai saba jesay